NDI და საქართველოს 3,161 მოქალაქე ნატოზე, ქართულ რეფორმებზე, ქართულ-რუსულ ურთიერთობებზე, ქართულ დემოკრატიაზე, ბიძინა ივანიშვილზე, ლაზიკაზე და ა.შ

აშშ-ის ეროვნულ-დემოკრატიულმა ინსტიტუტმა (NDI) 2012 წლის საზოგადოებრივი კვლევის შედეგები გამოაქვეყნა. ქვეყნის მასშტაბით, 3,161 რესპონდენტი გამოიკითხა.

კვლევების თანახმად, რესპოდენტებისთვის უმთავრეს პრიორიტეტებს სამუშაო ადგილები, ტერიტორიული მთლიანობა და ხელმისაწვდომი ჯანდაცვა წარმოადგენს, საქართველოში დასაქმების მაჩვენებელი შემდეგნაირად გადანაწილდა: დასაქმებულია სრულ ან ნახევარ განაკვეთზე 30%; უმუშევარია და სამსახურს ეძებს 33%; უმუშევარია
 და არ ეძებს სამსახურს 7%; აქტიურ შრომით რესურსს კი მხოლოდ 29% წარმოადგენს.

მიუხედავად იმისა, რომ მოსახლეობის 70% ემხრობა მთავრობის გაცხადებულ მიზანს, საქართველო გახდეს ნატო-ს წევრი, 88% არ მოსწონს საქართველოს ამჟამინდელი ურთიერთობა რუსეთთან. კითხვაზე, როდის გახდება საქართველო ნატო-ს წევრი _ გამოკითხულთა 59% მიიჩნევს, რომ არ იცის, 23% იმედოვნებს, რომ 2014 წელს ან მის შემდგომ. ამასთან, გამოკითხულთა 74%-ს სურს, რომ საქართველო გახდეს ევროკავშირის წევრი.

რესპონდენტთა 66%-სთვის მისაღებია პრეზიდენტ მიხეილ სააკაშვილის მოწოდება რუსეთთან დიალოგის გამართვის შესახებ იმ პირობით, თუ რუსეთი აფხაზეთიდან და ე. წ. სამხრეთ ოსეთიდან საელჩოებს გაიწვევს. 53% ემხრობა საქართველოს მთავრობის თხოვნას, ამერიკამ გაზარდოს საქართველოს სამხედრო თავდაცვისუნარიანობა.
რუსეთთან საქართველოს ახლანდელი ურთიერთობა გამოკითხულთა 88%-ს არ მოსწონს. გამოკითხულთა 49% ყველაზე მეტად ეთანხმება მოსაზრებას, რომ რუსეთი საქართველოსთვის რეალურ და არსებულ საფრთხეს წარმოადგენს. 30%-ის აზრით, რუსეთი საფრთხეს წარმოადგენს, მაგრამ ეს საფრთხე გაზვიადებულია. მხოლოდ 8% მიიჩნევს, რომ რუსეთი არანაირ საფრთხეს არ წარმოადგენს.
კითხვაზე "რომელი სამი რეფორმა იქნებოდა საქართველოსთვის ყველაზე მნიშვნელოვანი" ჯანდაცვის რეფორმა დაასახელა 45%-მა; სოფლის მეურნეობის რეფორმა – 39%-მა; საპენსიო რეფორმა – 28%-მა. შემდეგი პოზიცია დაიკავა – განათლების რეფორმამ – 23%; გამოკითხულთა მხოლოდ 20% მიიჩნევს მნიშვნელოვნად საარჩევნო რეფორმას; იგივე მაჩვენებელი აქვს საგადასახადო რეფორმას; სასამართლო რეფორმას მხოლოდ რესპონდენტთა 15%-მა დაუჭირა მხარი, ხოლო რეფორმას მედიაში ყველაზე მნიშვნელოვნად 5% მიიჩნევს.
რესპონდენტთა 64%-ს საპარლამენტო არჩევნებში მონაწილეობაზე დადებითი პასუხი აქვს.
როგორც კვლევაშია აღნიშნული, გამოკითხულთა 55% მიიჩნევს, რომ საქართველო ძირითადად სწორი მიმართულებით ვითარდება. რესპონდენტთა 14% კი ფიქრობს, რომ ძირითადად არასწორი მიმართულებით ვითარდება; 8% თვლის, რომ საქართველო საერთოდ არ იცვლება; 7% - ნამდვილად სწორი მიმართულებით ვითარდება, ხოლო 4% - ნამდვილად არასწორი მიმართულებით ვითარდება. გამოკითხულთა 11%-მა კითხვაზე პასუხი არ იცის.
რესპონდენტთა ასევე 55% ნაწილობრივ ეთანხმება იმ მოსაზრებას, რომ არსებული ხელისუფლება მათთვის მნიშვნელოვან ცვლილებებს ახორციელებს. ნაწილობრივ არ ეთანხმება – 14%; სრულად ეთანხმება - 13%; საერთოდ არ ეთანხმება - ასევე 13%; 4%-მა კითხვაზე პასუხი არ იცის.
პროცენტული მონაცემები იცვლება ადგილობრივ ხელისუფლებასთან მიმართებაში – ნაწილობრივ ეთანხმება გამოკითხულთა 47%; ნაწილობრივ არ ეთანხმება – 17%; საერთოდ არ ეთანხმება – 19%; სრულად ეთანხმება – 9%; არ იცის პასუხი – 8%; უარი პასუხზე – 1%;
კითხვაზე "არის თუ არა საქართველოში დემოკრატია?", - გამოკითხულთა 49% მიიჩნევს, რომ არის, 34%-მა კი უარყოფითი პასუხი გასცა. .

კვლევა ასევე მოიცავდა კითხვებს "ქართული ოცნების" ლიდერ ბიძინა ივანიშვილთან დაკავშირებითაც. გამოკითხულთა 87%-მა იცის პრეზიდენტის ბრძანებულება ბიძინა ივანიშვილისთვის საქართველოს მოქალაქეობის ჩამორთმევის შესახებ, 11%-მა კი არ იცის; 65% არ ეთანხმება ივანიშვილისთვის მოქალაქეობის ჩამორთმევას, 13%- ეთანხმება, 21%-მა – არ იცის; მოქალაქეობის აღდგენას ემხრობა გამოკითხულთა 70% , 8% წინააღმდეგია, 22%-მა კი - არ იცის.

ამასთან, გამოკითხულთა 84%-სთვის ცნობილია პრეზიდენტ მიხეილ სააკაშვილის ინიციატივა, ააშენოს ახალი ქალაქი ლაზიკა, რომელიც საქართველოში სიდიდით მეორე ქალაქის ადგილს დაიკავებს და შავ ზღვაზე მესამე პორტი იქნება. 13%-მა ამ ინიციატივის შესახებ არ იცის. აღნიშნული 84%-დან, რომლისთვისაც ცნობილია ეს ინიციატივა, ლაზიკას მშენებლობას მხარს უჭერს 59%, 27% კი - არა, 14%-მა არ იცის. ლაზიკას მშენებლობის "მოწინააღმდეგეთაგან" 33% მიიჩნევს, რომ სოციალური საკითხების მოგვარება უფრო მნიშვნელოვანია; 32% - არსებული ქალაქების განვითარება უფრო მნიშვნელოივანია; 22% ფიქრობს, რომ გაუმართლებელი ხარჯებია; 9%-ის აზრით კი საფრთხეს უქმნის გარემოს; კითხვაზე, უნდა გამართულიყო თუ არა საჯარო განხილვები და კონსულტაციები პარლამენტში, ვიდრე პრეზიდენტი ამ ინიციატივას გაახმაურებდა, რესპონდენტთა 68% პასუხობს, რომ აუცილებლად უნდა გამართულიყო, 8% მიიჩნევს, რომ არ უნდა გამართულიყო, 24%-მა კი ამ კითხვაზე არ უპასუხა.

მომზადებულია ინტერნეტგამოცემებზე დაყრდნობით